కంప్యూటర్ ఎంబ్రాయిడరీ మెషిన్ ద్వారా లక్షలు సంపాదించే మార్గాలు

చాలా మంది ఇంటిదగ్గరే ఉండే మహిళలు పిల్లలను చూసుకుంటూనే చేసుకునే సులభమైన బిజినెస్ లు చాలా ఉన్నాయి. అందులో ప్రధానమైనది కుట్లు, అల్లికలు, ఎంబ్రాయిడరీ అని అందరికీ తెలిసిందే. అయితే ఇందులో కొత్తేముంది. అని తీసిపారేయొద్దు. నిజానికి టైలరింగ్ వర్క్స్ ద్వారా కొద్ది మొత్తంలో ఆదాయం అయితే వస్తుంది. కానీ పెద్ద మొత్తంలో ఆదాయం ఎలా సాధ్యం అనే సందేహం రావచ్చు. అయితే ప్రస్తుతం టెక్నాలజీకి మీ తెలివితేటలను జోడిస్తే లక్షల్లో సంపాదించవచ్చు. అందులో ఒక బిజినెస్ గురించి తెలుసుకుందాం. ఎంబ్రాయిడరీ వర్క్స్ ద్వారా మంచి ఆదాయం వస్తుందని అందరికీ తెలిసిందే. ఈ మధ్య కాలంలో కంప్యూట‌ర్ ద్వారా చేసే ఎంబ్రాయిడ‌రీ డిమాండ్ పెరిగింది. మీకు టైలరింగ్ రాదని బాధ అవసరం లేదు. కేవలం కంప్యూట‌ర్ వాడ‌డం తెలిస్తే చాలు..సుల‌భంగా ఎవ‌రైనా.. ఈ బిజినెస్ చేయ‌వ‌చ్చు. దీంతో నెల‌కు లక్షల్లో సంపాదించేందుకు అవ‌కాశం ఉంది.కంప్యూట‌ర్ ఎంబ్రాయిడ‌రీ కోసం ఓ మిషిన్ కొనుగోలు చేయాల్సి ఉంటుంది. మార్కెట్‌లో మ‌న‌కు రూ.90వేల నుంచి రూ.25 ల‌క్ష‌ల విలువ చేసే ఎంబ్రాయిడరీ మెషిన్లు అందుబాటులో ఉన్నాయి. పెట్టుబ‌డిని బట్టి మీ వ్యాపారం సెట్ చేసుకోవాల్సి ఉంటుంది. ఎంబ్రాయిడరీ మెషిన్స్ గురించి మీకు ఇంటర్నెట్, యూట్యూబ్స్ లో మంచి సమాచారం ఉంది. అంతేకాదు ఇండియామార్ట్ లాంటి ఈ-కామ‌ర్స్ సైట్ల‌లో అందుబాటులో ఉన్నాయి. వీటిని కొనుగోలు చేస్తే సర్వీస్ కేంద్రం వారే వచ్చి ఫిక్స్ చేస్తారు. అంతేకాదు శిక్ష‌ణ కూడా ఇస్తారు.

పని ఎలా చేస్తుందంటే...

కంప్యూట‌ర్ ఎంబ్రాయిడ‌రీ మెషిన్ల‌కు కంప్యూట‌ర్ అనుసంధానించి ఉంటుంది. కంపెనీ వారు ఇచ్చే డిజైన్లు ప్రోగ్రాం చేసి ఉంటాయి. క‌స్ట‌మ‌ర్లు ఎంచుకున్న డిజైన్‌ను అందులో ఫిక్స్ చేసి.. క్లాత్‌ను ఒక ఫ్రేమ్‌లో అమ‌ర్చి.. దాన్ని మెషిన్ నీడిల్ కింద స‌రైన పొజిష‌న్‌లో ఉంచితే చాలు.. దానంత‌ట అదే స్టిచింగ్ అవుతుంది. ఇలా ఓ 60 నుంచి 90 నిమిషాల్లో చిన్న మెషిన్ల‌పై కంప్యూట‌ర్ ఎంబ్రాయిడ‌రీ చేయ‌వ‌చ్చు. పెద్ద మెషిన్ల‌పై ఈ ప‌ని 30 నిమిషాల్లోపే పూర్త‌వుతుంది. ఒకేసారి ఎక్కువ దుస్తులు లేదా క్లాత్‌పై పెద్ద మెషిన్ల ద్వారా ఎంబ్రాయిడ‌రీ చేయ‌వ‌చ్చు. ఇక ఈ మెషిన్ల నిర్వ‌హ‌ణ‌కు కేవ‌లం విద్యుత్ మాత్ర‌మే ఖ‌ర్చు అవుతుంది. రంగుల దారాలు అవ‌స‌రం అవుతాయి. కస్ట‌మ‌ర్లు ఎంచుకునే డిజైన్‌ను బ‌ట్టి ముత్యాలు, ప‌లు ర‌కాల పూస‌ల‌ను అమ‌ర్చాల్సి ఉంటుంది.